យុទ្ធនាការស្នើសុំឲ្យក្រសួងបរិស្ថានដាក់តំបន់កោះកុងក្រៅជាឧទ្យានជាតិដើម្បីការពារធនធានធម្មជាតិនេះកុំឲ្យមានការបំផ្លាញ់នៅពេលអនាគត់

កោះកុងក្រៅជាកោះធំជាងគេនៅកម្ពុជាដែលប្រជាពលរដ្ឋខ្មែរភាគច្រើនមិនដែលស្គាល់ ឬសូម្បីតែលឺឈ្មោះ។ កោះនេះស្ថិតនៅទិសនិរតី ក្នុងឃុំជ្រោយប្រោះ ស្រុកកោះកុង ខេត្តកោះកុង ជាប់នឹងព្រំប្រទល់កម្ពុជា−ថៃ។ យោងតាមរូបភាពផ្កាយរណបសំអាងបន្ថែមផង បូករួមទាំងសកម្មភាពចុះទៅឃើញផ្ទាល់ភ្នែកកាលពីថ្ងៃទី១៨ ខែកក្កដាថ្មីៗនេះផង ពួកយើងមានការភ្ញាក់ផ្អើលយ៉ាងខ្លាំងនៅពេលដែលឃើញសភាពព្រៃឈើក្រាសឃ្មឹកដុះគ្របដណ្តប់ពាសពេញផ្ទៃកោះ ដោយមិនទាន់មានការបំផ្លាញដូចតំបន់ដ៏ទៃទៀតនៅឡើយ ចំណែកឯជីវចម្រុះដូចជាផ្កាថ្មនៅប៉ែកខាងលិចកោះក៏មានច្រើនគួអោយកត់សំគាល់។ កោះនេះមានឆ្នេរខ្សាច់សក្បុសរចំនួន៦ កន្លែង ដែលក្នុងនោះមានឆ្នេរ២កន្លែងមានប្រវែងវែង ស្អាតអស្ចារ្យមិនចាញ់ឆ្នេរសមុទ្រខេត្តព្រះសីហនុពីមុននោះទេ។ ដោយសារសក្តានុពលព្រៃឈើផង រួមទាំងជាកោះនៅដាច់ស្រយាលពីគេផង យើងមើលឃើញថាកោះដែលមានផ្ទៃដីមហិមានេះ សាកសមបំផុតដើម្បីរក្សាទុកសម្រាប់ជាជម្រកសត្វ ឬប្រភេទសត្វកម្រ ដ៏ធំមួយនៅកម្ពុជា។ កោះកុងក្រៅមានលក្ខណៈសម្បត្តិលើសពីគ្រប់គ្រាន់ ដូច្នេះ ពុកម៉ែបងប្អូនជាពិសេសយុវជនដែលស្រលាញ់ចង់ការពារបរិស្ថាន សូមចូលរួមជាមួយពួកខ្ញុំក្នុងយុទ្ធនាការស្នើរសុំអោយក្រសួងបរិស្ថានដាក់តំបន់នេះជាតំបន់ការពារសម្រាប់កូនចៅយើងជំនាន់ក្រោយ សូមអរគុណ!