ជារៀងរាល់ថ្ងៃប្រសិនបើយើងធ្វើដំណើរនៅក្នុងរាជធានីភ្នំពេញ អ្នកដំណើរទាំងឡាយតែងប្រទះឃើញក្រុមក្មេងតូចៗនាំគ្នា លើកដៃសំពះសុំលុយ ជូតឡានម៉ូតូ ក៏ដូចជាលក់ផ្កានៅតាមភ្លើងស្តុបនានា ។ ជាមួយគ្នានេះដែរ អ្វីដែលគួរឲ្យកត់សម្គាល់ចំពោះក្រុមក្មេងតូចៗទាំងនោះ គឺពួកគេមួយចំនួនថែមទាំងហ៊ានកាក់ ម៉ូតូឡានសុំលុយ រត់ឆ្លងកាត់ផ្លូវឡានម៉ូតូដែលកំពុងធ្វើចរាចរណ៍ ហើយថែមទាំងយកផ្កាទៅពាក់លើម៉ូតូឡានដែលគេមិនចង់ទិញផ្កាទាំងនោះទៀតផង ។ ជាក់ស្តែង នៅចំណុចភ្លើងស្តុបអាគាកាណាឌីយ៉ា អ្នកដំណើរទាំងឡាយតែងប្រទះឃើញ ក្មេងតូចៗ បានយកផ្កាទៅពាក់លើម៉ូតូឡានដែលឈប់ចាំភ្លើងស្តុប ទោះបីពួកគេប្រាប់ថាមិនទិញ ឬស្តីថាយ៉ាងណា ក៏ពួកគេនៅតែមិនព្រមយកចេញដែរ តែបែរជាឈរនៅពីមុខឡាន ម៉ូតូ ដែលមើលទៅពិតជាមានគ្រោះថ្នាក់ណាស់ ។ តាមរយៈសកម្មភាពរបស់ក្មេងតូចៗទាំងនោះ វាប្រាកដណាស់ថាសកម្មភាពរបស់ពួកគេពិតជាមានការបញ្ចុះបញ្ចូល បង្ខិតបង្ខំ ឬគម្រាមគំហែងពីមនុស្សចាស់ ឬក្រុមណាមួយ បើពុំដូច្នោះទេ ពិតណាស់ពួកគេប្រហែលជាមិនហ៊ានធ្វើដូចនោះទេ ។ ជាមួយគ្នានេះដែរសកម្មភាពរបស់ពួកគេ អាចបង្កឲ្យមានផលអវិជ្ជមានដូចជា៖ – បញ្ហាស្ទះចរាចរណ៍ – ផ្តល់ការរំខានជាខ្លាំងដល់អ្នកដំណើរ – អាចបង្កជាគ្រោះថ្នាក់ផ្សេងៗ – បាត់បង់សណ្តាប់ធ្នាប់សាធារណៈ – បង្កើតជាទម្លាប់អាក្រក់ ដែលជាវិបត្តរបស់សង្គមជាដើម ។ -ល-។ ដូចនេះហើយជាសំណូមពរក្នុងនាមជាប្រជាពលរដ្ឋ ស្នើរសុំដល់ប្រមុខរដ្ឋាភិបាល មន្ត្រីមាន សមត្ថកិច្ច អាជ្ញាធរ អង្គការ ស្ថាប័នពាក់ព័ន្ធនានា សូមចូលរួមដោះស្រាយបញ្ហាទាំងនេះជាបន្ទាន់ ដើម្បីសណ្តាប់ធ្នាប់សង្គម បង្កភាពងាយស្រួលដល់ប្រជាពលរដ្ឋទូទៅ ក៏ដូចជាផ្តល់ឲ្យក្មេងៗដែលជាទំពាំងស្នងឬស្សីទាំងនោះទទួលបានឱកាសក្នុងការអប់រំ ការគាំពារ ជាពិសេសការគោរពសិទ្ធិកុមារដូចក្មេងៗទូទៅ ៕ សូមអរគុណ!
Comments (1)
ខៃសិញ កែវព្រះភ្លើងsays:
ខែសីហា 20, 2019 at 4:46 ព្រឹកI support u