ក្រុមបណ្តាញនិស្សិតបានរកឃើញទីតាំងរោងចក្រកំពុងដំណើរការសាងសង់រោងចក្រផលិតម្សៅរមៀតមួយដ៏ធំដែលបានចាប់ផ្តើមប្រមាណ៥ខែកន្លងមកហើយ មានទីតាំងនៅចំណុចកូអរដោណេ(X:0331311,Y:1291486) ចំងាយប្រមាណ២គីឡូម៉ែត្រស្ថិតនៅខាងក្រោយសាលាស្រុកថ្មបាំង ទីរួមស្រុកថ្មបាំង ខេត្តកោះកុង ។
តាមការស៊ើបអង្កេតនៅក្នុងទីតាំងផលិតម្សៅរមៀតនេះមានទំហំប្រមាណ១០០ហិចតា ស្ថិតនៅជាប់ចំណោតផ្តាច់ជីវិត ដោយក្រុមហ៊ុនបានដាក់កំលាំងប្រដាប់អាវុធ យាមកាមយ៉ាងតឹងរ៉ឹង ពង្រាយកម្មករសំរុកសាងសង់ឃ្លាំង អាគារស្នាក់នៅ សំណង់បរិវេណរំលាយវល្លិ៍រមៀត ស្រះសំរាប់ស្តុកកាកសំណល់អាស៊ីត និងឃ្លាំងស្តុកអំបិលរាប់តោនជាដើម ហើយក្រុមហ៊ុនក៏បានប្រកាសជ្រើសរើសកម្មករ និងប្រកាសទិញវល្លិ៍រមៀតតម្លៃ២០០រៀលក្នុង១គីឡូក្រាម ដែលមានថៅកែជាជនជាតិចិនកំពុងរត់សុំលិខិតអនុញ្ញាតពីរាជរដ្ឋាភិបាល។
ប្រវត្តិ៍រោងចក្រវល្លិ៍រមៀតៈ
រោងចក្រវល្លិ៍រមៀតត្រូវបានរាជរដ្ឋាភិបាលបានបិទម្តងរួចមក ហើយកាលពីឆ្នាំ២០១៤ ដែលផលិតដោយក្រុមហ៊ុនទ្រី ភាព នៅខេត្តពោធិសាត់ ។ ក្រុមហ៊ុនទ្រី ភាព បានទទួលសិទ្ធិកែប្រមូល និងកែច្នៃវល្លិ៍រមៀតនៅកម្ពុជា តាមច្បាប់អនុញ្ញាតចុះហត្ថលេខាដោយលោក ឡោ រស្មី អគ្គលេខាធិការក្រសួងកសិកម្ម រុក្ខាប្រម៉ាញ់ និងនេសាទ និងលោក ចាន់ សារុន រដ្ឋមន្រ្តីក្រសួងកសិកម្មរុក្ខាប្រម៉ាញ់ និងនេសាទ និង លោក ឆេង គឹមស៊ុន ប្រធានរដ្ឋបាលព្រៃឈើ ក្នុងលិខិតអនុញ្ញាតចុះថ្ងៃទី១ ខែមីនា ២០១៣។ គួរបញ្ជាក់ដែរថា លោក ឈុត វុទ្ធី ត្រូវបានបាត់បង់ជីវិត នៅក្នុងបេសកកម្មស៊ើបអង្កេតអាជីវកម្មវល្លិ៍រមៀត ដោយក្រុមប្រដាប់អាវុធ នៅខេត្តកោះកុងកាលពីឆ្នាំ២០១២កន្លងមក។
វល្លិ៍រមៀត (Yellow Vine) ជាប្រភេទរុក្ខជាតិវល្លិ៍ម្យ៉ាងដែលមានជាតិពុល រស់ជាតិជូរផ្អែមដូចស្ពាន់ធ័រលាយស្ករត្នោតវាជាសារជាតិមេ សម្រាប់ផលិតគ្រឿងញៀន ជាពិសេស អិចស្តាស៊ី ។ បណ្តាញនិស្សិតមានក្តីបារម្ភយ៉ាងខ្លាំងថា ផលិតផលវល្លិ៍រមៀត ជាសារធាតុផ្សំមួយសំរាប់ផលិតគ្រឿងញៀន ដែលបំផ្លាញអាយុ
ជីវិតមនុស្ស ជាពិសេសយុវជន ជាតិអាស៊ីត ដែលបង្ហូរចេញពីកាកសំណល់បានបំផ្លាញប្រព័ន្ធបរិស្ថាននិង អាយុជីវិតរបស់ប្រជាពលរដ្ឋ ដែលរស់នៅជុំវិញនោះ។ ដោយមើលឃើញពីផលប៉ះពាល់នៃអាជីវកម្មវល្លិ៍រមៀតនេះ បណ្តាញនិស្សិត សំណូមពរជាទទួចទៅរាជរដ្ឋាភិបាល ជួយចាត់វិធានការទប់ស្កាត់ អាជីវកម្មវល្លិ៍រមៀតតទៅទៀត ទោះជានៅក្នុងរូបភាពកែច្នៃបែបណាក៏ដោយ ជាពិសេសមិនឲ្យមានរោងចក្រអាជីវកម្មស្ថិតនៅក្នុងតំបន់ការពារជាដាច់ខាត ។
ព័ត៌មានបន្ថែមសូមទាក់ទងៈ
១/និស្សិតឈ្មោះ ហេង ស្រស់ រៀនផ្នែកកសិកម្ម លេខទូរស័ព្ទៈ ០៩៨៥៣៥៥៩៧
២/និស្សិតឈ្មោះ ណេង ពៅ រៀនផ្នែកព័ត៌មានវិទ្យា លេខទូរស័ព្ទៈ០១០៤៦៨៨០២
៣/និស្សិតឈ្មោះ ប៉ោក ពិសិដ្ឋ រៀនផ្នែកវិទ្យាសាស្ដ្រគ្រប់គ្រង លេខទូរស័ព្ទៈ០៧០២៣១១០៧
៤/និស្សិតឈ្មោះ វង្ស បញ្ញា រៀនផ្នែកច្បាប់ លេខទូរស័ព្ទៈ០៨១៨៧៤៨៤៨
៥/លោក អ៊ួច ឡេង ប្រធានក្រុមកិច្ចការពិសេសសិទ្ធិមនុស្សកម្ពុជា
លេខទូរស័ព្ទៈ ០១៦៧០៥៥៦៧ ៕
Comments (0)
អនាមិកsays:
ខែឧសភា 17, 2019 at 7:18 ព្រឹកA comment about